Configuración de Apache
Apache Server é un servidor web que basea a súa configuración en ficheiros, é dicir, a configuración realízase mediante a creación e/ou modificación de ficheiros de texto que conteñen diferentes tipos de instrucións, chamadas directivas. Estas directivas son interpretadas polo servizo apache2.
Apache Server non dispón de ningunha interface gráfica oficial para a súa administración. A súa administración está pensada para realizarse a través da terminal.
Moito do traballo de configuración vai consistir en crear ou modificar ficheiros, pero non é suficiente con só modificalos. Para aplicar os cambios que se introduciron, é necesario reiniciar Apache Server:
$ sudo systemctl restart apache2
Se modificamos algún ficheiro e vemos que non se produciron cambios, o máis probable é que se nos esquecera executar o comando anterior.
Se o comando de reinicio mostra unha mensaxe de error é porque algún ficheiro ten unha configuración incorrecta ou que non é válida. A mensaxe que se mostra é a seguinte:
Job for apache2.service failed because the control process exited with error code.
See "systemctl status apache2.service" and "journalctl -xe" for details.
Podemos comprobar o estado do servidor para buscar por que se producíu o error:
$ systemctl status apache2
Para obter información moito máis detallada, utilizaremos o seguinte comando:
$ journalctl -xe