Servidores virtuais
Non sempre podemos (ou é necesario) dispoñer dunha máquina física dedicada para cada aplicación web que queiramos aloxar.
Existe a posibilidade de albergar varias aplicacións web nun único equipo. Da mesma maneira que se poden crear máquinas virtuais nun equipo, tamén é posible aplicar a virtualización ao servizo web e crear servidores virtuais para cada un dos sitios web que queiramos aloxar nun equipo.
Denomínase aloxamento virtual á técnica que permite hospedar múltiples sitios web sobre un mesmo servidor web. Cada un deses sitios web recibe o nome de servidor virtual (Virtual Host).
Servidores virtuais baseados en IP
No aloxamento baseado en dirección IP (IP-based) cada servidor virtual debe ter asignada unha dirección IP diferente.
Este método é o máis complexo, debido a que temos que ter varias interfaces no router: unha por cada dirección IP.
Exemplos de virtual hosts baseados en IP:
| IP | Porto | Nome |
|---|---|---|
| 192.168.1.10 | 80 | http://exemplo1.com |
| 192.168.1.11 | 80 | http://exemplo2.com |
| 192.168.1.12 | 80 | http://exemplo3.com |
Podemos observar como a columna da IP vai variando. O dominio tamén o fai porque, neste caso, cada dominio ten asignada unha IP diferente.
Servidores virtuais baseados en porto
No aloxamento baseado en porto (port-based) cada servidor virtual ten asignado un porto TCP diferente.
Non se emprega habitualmente porque o cliente debe coñecer o porto para acceder ao sitio web e introducilo manualmente no navegador web. Ademais, non adoita ser boa práctica empregar portos diferentes aos predeterminados dos servizos web (80 e 443).
Exemplos de virtual hosts baseados en porto TCP:
| IP | Porto | Nome |
|---|---|---|
| 192.168.1.10 | 9000 | http://exemplo1.com |
| 192.168.1.10 | 9001 | http://exemplo1.com |
| 192.168.1.10 | 9002 | http://exemplo1.com |
Podemos observar como a columna do porto é a que vai variando.
Servidores virtuais baseados en nome
No aloxamento baseado en nome (name-based) cada servidor virtual ten asignado un nome de dominio diferente.
Este método é o máis sinxelo de empregar e o máis recomendable.
Exemplos de virtual hosts baseados en nome:
| IP | Porto | Nome |
|---|---|---|
| 192.168.1.10 | 80 | http://exemplo1.com |
| 192.168.1.10 | 80 | http://exemplo2.com |
| 192.168.1.10 | 80 | http://exemplo3.com |
Podemos observar como a columna do nome de dominio é a que vai variando.